Հեռախոսային
տարբերակ
Ամբողջ
տարբերակը
Չորեքշաբթի, 16 Հունվար arm rus eng
arm
(Translit)
USD =486.41 AMD
EUR =557.52 AMD
Թուրքիայի խորհրդարանում հարձակվել են Գարո Փայլանի վրա
21.12.17 16:37
Թուրքիայի խորհրդարանում հարձակվել են Գարո Փայլանի վրա

Թուրքիայի քրդամետ «Ժողովուրդների դեմոկրատական կուսակցության» (HDP-ԺԴԿ) պոլսահայ պատգամավոր Գարո Փայլանի և իշխող «Արդարություն և զարգացում կուսակցության» (AKP-ԱԶԿ) պատգամավորների միջև վիճաբանություն է տեղի ունեցել:

Ինչպես տեղեկացնում է թուրքական «Demokrathaber» լրատվական կայքը, վիճաբանությունը սկսվել է այն բանից հետո, երբ Փայլանը ֆինանսների նախարար Նաջի Աղբալին կոչ է արել ուսումնասիրել Թուրքիայի նախագահ Ռեջեփ Թայիփ Էրդողանի հարազատներին վերաբերող օֆշորային գոտիներում ներդրումներ կատարելու մասին հրապարակումները:

Փայլանը մեջլիսում ելույթի ժամանակ քննադատել է նախարարությանը՝ նշելով, որ չնայած փաստաթղթերի հրապարակմանը ֆինանսների նախարարությունը, Ֆինանսական հանցագործությունների քննության վարչությունը որևէ քայլ չեն ձեռնարկում: Փայլանը պահանջել է, որ նախարար Աղբալը ֆինանսական հանցագործությունների քննության վարչությանը հանձնարարի համապատասխան գործընթաց սկսել՝ նշելով. «Հակառակ դեպքում այս երկրում այսպիսի անբարոյականությամբ, այսպիսի հարկային անբարոյականությամբ չեք կարող առաջ շարժվել»:

Փայլանին հակադարձել է ԱԶԿ-ական պատգամավորներից Իլքնուր Ինջեյոզը՝ ասելով, թե Փայլանը վերջին մարդն է, ով կարող է բարոյականության մասին դասեր տալ:

«Մեջլիսում դուք վերջինն եք, ումից բարոյականության մասին դասեր պիտի ստանանք, անգամ այդ վերջինն էլ չեք, սա էլ ուզում եմ հատուկ ընդգծել: Դու այս մեջլիսում անգամ վերջին մարդը չես»:

Փայլանը Ինջեյոզի վերոնշյալ խոսքերից հետո նրան կարգի է հրավիրել՝ ասելով. «Անտակտ մի եղիր»:

Աղբյուրի տեղեկացմամբ՝ այս խոսքից հետո ԱԶԿ-ական պատգամվորները, այդ թվում նաև Ինջեյոզը շարժվել են Փայլանի ուղղությամբ: Վիճաբանությունը հանդարտեցնելու նպատակով նիստն ընդմիջվել է:

Հիշեցնենք, որ Թուրքիայի գլխավոր ընդդիմադիր «Ժողովրդահանրապետական կուսակցության» առաջնորդ Քեմալ Քըլըչդարօղլուն հայտարարել էր, որ Էրդողանի ընտանիքն ու հարազատները օֆշորային գոտում (Մեն կղզում) միլիոնավոր դոլարների ներդրում են արել: ԺՀԿ-ն մեղադրանքները հաստատող փաստաթղթեր է հրապարակել:

Աղբյուր` Ermenihaber.am

Slaq.am - Լրատվական աղբյուր

Վերադառնալ
SLAQ.am || 2009-2019. All rights reserved.
Developed by Studio One